عليكم بالبانكو (بالكاف) ... عالسريع كده ...

عليكم بالبانكو (بالكاف) ... عالسريع كده ...

أحياناً المزارع بيحتار يزرع أيه في وقت قصير مزنوق ما بين العروات .. نهاية العروة الصيفي المبكر او الصيفية العادية وقبل العروة النيلية او الشتوية البدرية ... بيكون الوقت المتاح 70 أو 75 يوم ودول مش هيكفو ينزرع محصول بيقعد 3 شهور او 4 شهور ....

طيب ممكن نزرع أيه ويكون تكلفة محدودة وعائد كويس ..

أنا هقولكم ...

عليكم بالبانكو (بالكاف) ... عالسريع كده ..

زراعة وقت الفراغ وزرعة بين العروات...

محصول البلكم أو البانكو كما يسموه المزارعين .. وهو حبوب الطيور ... وهو زرعة سريعة ما بين العروات ..

بيقعد 70 الي 75 يوم في الارض ما بين العروة الصيفي والنيلي .. ( يعني مش هينافس المحاصيل الاستراتيجية زي الذرة او الصويا او الزيتية ) ..

الفدان يحتاج 15 ك تقاوي والزراعة بدار في أحواض زي القمح في آخر شهر يونيو (6) وشهر يوليو (7) والزراعة البدري في النص التاني من شهر مايو (5) بتجيب أعلى انتاجية .. ولا يحتاج إلا 50 ك سماد ازوت ولمرة واحدة ويحتاج 5 ريات ويحصد زي القمح ويتم دراسه بمصافي ضيقة عن بتاعة القمح .. والفدان سهل يجيب طن ( سعر الطن يتراوح ما بين 40-50 ألف جنيه) .. ويتحمل الملوحة نسبياً ...

وعشان ما يلبخشي الأرض لازم الأرض بعد ما يتحصد تتحرث حرثه عميقة متعامدة ويضاف لها أسمدة تنشيطية ( سلفات نشادر مثلا) قبل الزرعة اللي بعده ..

المناطق المشهورة بزراعته : غروب المنيا واسيوط وغرب الفشن وبنزرع في جميع أنواع الأراضي عدا الأراضي المالحة او الغدقة ...

دكتور محمد علي فهيم

17 ابريل 2024

9 برمودة 740

8 شوال 1445