مزارعي البطاطس النيلي

مزارعي البطاطس النيلي

 

 

أهم الملاحظات والتوصيات والتنبيهات خلال الفترة دي ..

** الكل ملاحظ الانكسار في الحرارة الكبير وإن حرارة الليل بقت أقل من 18 درجة .. ودي فرصة كبيرة قوي للتحجيم الطبيعي للبطاطس .. 

 

** معظم زراعات البطاطس للعروة النيلية او الشتوية المبكرة (فى المنيا ونكلة وبعض مناطق المنصورة وغيرها ) تعدت عمر 45 – 55 يوم ... وان كانت بعض الزراعات نيلية متأخرة والتي تعدى عمرها من 30 – 45 يوم ...

 

 ** الاصناف المنزرعة في معظمها هي اصناف مبكرة او متوسطة التأخير مثل بيرن - ميترو - ليدي بالفور - كارا وبلليني وليدي روزيتا وبنوميره واريزونا ...الخ..

 

** لا تعانى زراعات البطاطس من اي اصابات حشرية او مرضية (الا بعض الحقول القليلة والمتناثرة بها بعض الاصابات بدودة ورق القطن ) ...

 

هااااام ... نظراً للاجواء الحارة التى سادت اثناء موسم النمو للبطاطس في سبتمبر واكتوبر اللى فاتوا ... فحدث استنزاف وضغط كبير على النمو وتأثر وتراجع كتير ... وبعد انكسار الحرارة وسيادة جو معتدل إلى بارد (ليلاً) بدأ الزرع فى اعطاء نمو خضري غزير (جداً) لدرجة ان النمو اللى حصل فى الاسبوعين اللى فاتو بس بكل النمو خلال الموسم كله ....

 

وده معناه ايه؟؟

ان العمر الحقيقي للزرع ناقص من 20 -25 يوم ولا يحسب من الزراعة .. والنقطة دي مهمة جداً جداً جداً .. لان البطاطس الان تعطي جهد غير طبيعي للنمو الخضري رغم ان العمر ده بتاع الصب والتحجيم ... وعشان البطاطس تعطي محصول (ذو شأن ) لازم نصبر عليها الموسم ده وبلاش استعجال التقليع ... بلاش استعجال التقليع ..

 

عشان كمان البطاطس لا تعطي كامل محصولها الا فى الشهر الاخير من عمرها (الحقيقي) .... وفى ظل ان السوق هيكون ماسك نفسه وحتى نص ديسمبر التاني .. فبكررر تاني ... بلاش الاستعجال فى التقليع 

 

وهنا فيه شوية توصيات هامة خاصة بادارة ما تبقي من موسم الانتاج (للعروة النيلية) سواء فى المنيا او الطويلة وبلقاس وطلخا او منوف او كفر الدوار... وغيرها :

 

- اضافة من 10 -12 كيلو بوتاسيوم (0 . 0 . 50) حقناً مع مياه الري وخلال الريات المتبقية من الموسم...

- اضافة من 3- 4 لتر حامض فسفوريك (80-85%) حقناً مع مياه الري مع عدم خلطه مع البونتاسيوم ويكرر لمدة ريتين متتاليتين ويساعد جداً فى دعم الدرنات فى عمليات التحجيم.

- الابتعاد عن اضافة اى مصدر للازوت فى كل المركبات اللى هنضيفها خلال هذه الفترة .. لان معظم الزراعات المبكرة فى مرحلة "هياج" للعرش واحنا عاوزين الزرع يتجه "بقوه" ناحية الصب والتحجيم والترصين ...

وللزراعات المتأخرة واللى بتعانى من نمو مش قوى يتم اجراء التالي:

وبعدها يتم رش ورقي :

يتم رش طحالب بمعدل 450جم + احماض أمينية بمعدل 600 / فدان .

اما الري ... فلو سمحتم ... لو سمحتم بلاش 4 - 5 فتحات مرة واحدة دي .. ارجوكم الحذر من زيادة مياه الري خلال هذه الفترة (كمان ان العرش مالى بطاني الخطوط وبيعيق المياه فبتكتر حول النباتات) ... الحل ان يكون الري على الحامي وب 2 او 3 فتحات (حواويل) بالكتير ...

 

ان شاء الله سيكون موسم زراعي مجزي لكل احبتي واخوتي مزارعي البطاطس

دكتور محمد على فهيم

16 اكتوبر 2023

6 بابه 1740