15 منشور الجمعة #تحذيرات_يتبعها_توصيات
دائماً
بنقول إن لكل موسم خصوصيته في أنماط المناخ والموسم ده النمط الأبرز هو زيادة فرق
حرارة الليل والنهار ( جو دافيء نهارا شديد البرودة ليلا ) .. زاد عليهم موضوع
الشبوره الكثيفه لحد ضباب ودي طبعا لها علاقه كبيره مش بس بالامراض ولكن العلاقه
كبيره جدا بانخفاض كبير في معدلات الامتصاص وده باين على محاصيل كثيره اليومين
دول..
وفي
ظل التدرج والتذبذب فى انخفاض الحرارة ليلاً خلال هذه الفترة وتستمر حتى نهاية شهر
طوبة على الأقل ...
#وجب_علينا_ان_نستجيب
للتحذيرات وونفذ التوصيات التالية :
1 -
القمح : انتهت تماما مواعيد زراعة القمح المتأخر ، ومينفعش نخاطر ونزرع الفترة دي
، مش هيعمل قش ويكون محصول ضعيف ... والناس تفحص غلتها كويس عشان الصدأ ده وقته
وظروفه .. ومفيش رش وقائي .. وممنوع استخدام مبيدات الحشائش في العمر اكبر من ٤٠
يوم ... ويمكن استخدام على سبيل المثال مبيد هربينو ٢٥٠ سم لـ ٢٠٠ لتر ماء فدان
للزمير .. وللعريضة مبيد جرناري .. (( رحم الله الدكتور عبد السلام المنشاوي رحمة
واسعة ))
2-
الفاصوليا الصيفي : محدش يزرع فاصوليا صيفي قبل 10 فبراير...
3-
البنجر عروة اغسطس: محدش يصرف في البوتاسيوم للبنجر اكبر من 140 يوم زيادة عن
اللزوم .. ويرش بورون 14 ٪ مرتين .. عشان موضوع السكر الكاذب.
4-
البطاطس الشتوي: محدش يضيف اي منظمات نمو البطاطس بعد 90 يوم عشان التحجيم .. فقط
البوتاسيوم والكالسيوم.
5-
البطاطس الصيفي: محدش يروي البطاطس مرتين ورا بعض بدون عزيق لاي سبب .. وممنوع
استخدام اليوريا والدفعة الأولي من التسميد يفضل أن تكون 3 سلفات نشادر او 2 نترات
نشادار بنظام خط وخط.. استخدام اليوريا بكثرة بيسبب أنها في سنوات اللفحة بتبدأ من
الأرض دي أو زيادة تشقق الدرنات في الأصناف الحساسة أو زيادة الإصابة بالمّن ...
الخ
6-
الفراولة: محدش يكتر استخدام الاحماض الامينية تماما .. دي فترة العفن الرمادي
والعفن الطري وتجدد الإصابة بالتبقعات وخاصة بعد انتهاء ايام الشبورة البرد وزيادة
الندي...
7-
المانجو المتأثرة بالبرودة: محدش يزيل الافرع الجافة دلوقتي حتي يحدث جريان
العصارة في الأشجار ... ويجب الانتهاء من تقصيف نسبة من الازهار علي نهاية الاسبوع
عشان تعمل اكتر من جيل على الشجرة ..
8-
البسلة والفول: محدش يرش اي نحاسيات دلوقتي أثناء التزهير والعقد ..
9-
البصل الفتيل: اوعى تنسى رشة وقائية هامة ضد الامراض الفطرية متستعجلوش رش
المغذيات المكثف علي البصل .. استنو بعد إجراء الرية الأولي ..
10-
الثوم: متستعجلوش رش الكالسيوم بورون دلوقتي ... وخليك في البوتاسيوم فوسفيت
والماغنسيوم فوسفيت شوية ...
11-
الخرشوف: اللي لازق وبيأخر الجمع قوي والورق بتاعه أبيض .. ما ترشوش اي احماض
امينية أو منشطات .. فقط كالسيوم فوسفيت وسترات بوتاسيوم...
12-
البرسيم: محدش يأخر الحشة الحالية واخلصو من الوش ده بدري عشان النبات يفوق بعد
موجة البرد مع إضافة حامض فسفوريك مع الرية اللي جاية 10 لتر.
13-
العنب المبكر – متطولشي الفترة ما بين التقليم والرش بكاسرات السكون ... ولو فيه
عيون بدأت تتفتح رش بالكبريت الميكروني عالطول ..
14-
مزارع المواشي: محدش يزود من التغذية علي برسيم اليومين دول عشان نقص الفسفور علي
المواشي وظهور البول المدمل...
15-
مزارع الأمهات السمكية: محدش يغير المياه العميقة بتاعة الأحواض تحت البلاستيك
ويكتفي بتغيير المياه السطحية بس مع تكثيف حمامات المضادات الحيوية.
دكتور
محمد علي فهيم
17 يناير 2024
8
طوبة 1741
17
رجب 1446
71
