خطوات تجهيز العروة الصيفي لمحصول البطاطس

خطوات تجهيز العروة الصيفي لمحصول البطاطس

#مزارعي_البطاطس_الصيفي

كنت وعدتكم بمنشور مفصل لا

هم الاعتبارات والتوصيات اللى نبدأ بها الموسم صح ... خاصة أن الموسم ده استثنائي بمعنى الكلمة ...

طب نركز مع بعض ....

#ميعاد_الزراعة_للبدري يكون بعد 25 نوفمبر ومينفعش ابكر عن كده لأسباب كتير أهمها أن التقاوي جايه محتاجة تحضير ، محتاجة تحضير .. كمان الميعاد قريب من مواعيد العروة المحيرة والإنتاج هيكون في نفس الوقت ، وايضا متوقع صقيع في اخر شهر 12 وبرده للاسف متوقع انتشار مبكر للندوة المتأخرة .. كل الأسباب دي تستدعي عدم استعجال الزراعة ..

#تخضير_البطاطس

بداية تجهيز الارض لزراعة البطاطس "الصيفي" فى المناطق اللى بتزرع العروة دي مبكر في جنوب الجيزة (قلعة المرازيق - الشوبك - ابو رجوان - العياط ...) القليوبية - دجوى ، المنوفية - الطويلة وطلخا وبلقاس - ابيس - نكلة العنب ...الخ.

اتبع التالي #بدون_تجويد أو تعقيد:

على البلاط قبل الحرث او بعد الحرثة الاولى وقبل التخطيط نفذ ما يلي:

1** البطاطس محصول منهك للتربة ومستنزف لها "جداً" - السباخ البلدي المتحلل (20 م3) يغنيك عن كثير من نقص العناصر فى التلت الاخير من عمرها ..

2** الارض السودة ثقيلة مدمجة باردة عشان كده من 10-13 شيكارة سوبر فوسفات الكالسيوم يعود لها دفئها وحيويتها وخفتها ونعومتها حول الدرنات المتكونة لاحقاً ..

3** لو الأرض بها نسبة ملوحة ضروري جدا إضافة الجبس الزراعي بمعدل 5 إلى 7 شيكارة لان البطاطس لا تجود ابدا في ارض بها ملوحة ...

4** الانبات كلها هيكون فى فترة باردة (اخر ديسمبر ويناير) فالبطاطس محتاجه جرعة تنشيطية من الازوت (بطيء التحلل) لزيادة معدل الانبات عشان كده من 2 شيكارة سلفات نشادر 20.5% هامة جداً لهذا الغرض.

5** وعشان تطهر التربة من بقايا فطريات وامراض التربة من الزرعة السابقة وعشان يكون فيه وسط غذائي مناسب للزرعة طول الموسم عشان كده من 1-2 شيكارة كبريت زراعي هتقوم بالغرض ده والكبريت عنصر غذائي ووقائي هام للبطاطس ولازم يتحول لصورة كبريتات ايونية بالتالى لازم يتمعدن داخل الترية ولذلك يضاف فقط مع التجهيز وقبل التخطيط ومش على وش التربة.

6** يتبقي اضافة هامة (للى يقدر عليها) اضافة من 1 – 2 شيكارة سلفات بوتاسيوم مع اخوتها السابقين - بيعمل حاجات حلوة مع الغلة (الدرنات) اللى هتنتج من غيطك او مزرعتك.

7** التخطيط يفضل الا يزيد عن 9 خطوط فى القصبتين (الموسم ده بالتحديد - لانه للاسف موسم فى اواخره مناسب للسوسة ويفضل يكون اتجاه التخطيط شرق - غرب.

8** اروي رية غزيرة ...

وانتظر باقي التعليمات

بعض المزارعين هيشتكوي ان التكلفة كده كتير فى التجهيز ... الاضافات دي هي الاساس للموسم كله وهيجنبك مشاكل كتير في الموسم .. ان شاء الله

الفيديو المرفق ... مقطع صوتي بيختصر الكلام اللى فوق ..

د. محمد علي فهيم

18 نوفمبر 2024

9 هاتور 1741

المشاركه علي منصات التواصل الأجتماعي

عدد المشاهدات

3