توصيات الفراولة نوفمبر 2024
#مزارعي_الفراولة_الكرام
في كل مكان مزروع فراولة ( شبين او بدر ، غرب او شرق) ...
** الكل تابع اللخبطة اللى في الجو من حيث ارتفاع واضح في حرارة النهار الخميس والجمعة والسبت ..
ثم الانخفاض الكبير بحوالي ٨ درجات درجة بداية من الاحد ويستمر حتى نهاية الأسبوع ده على الأقل ...
وللأسف التغير ده مكنش الزرع مستعد ليه او عامل حسابه ....
#طيب_الأيام_اللى_جايه نظامها أيه:
** استمرار الانخفاض ( الكبير) في الحرارة من الآن وحتى يوم السبت اللى جاي (30 / 11 ) ... ليكون جو شتوي بارد إلى شديد البرودة ( شتوي بامتياز ) ... .. ( وده فيه توصيات هامة جداً)
** بداية ارتفاع الحرارة نسبياً خلال بداية الأسبوع (الأحد 1 / 12 ) لتعود الحرارة إلى معدلاتها الخريفية الطبيعية لتكون حرارة النهار حول 23 °م شمالاً وحول 26 °م جنوباً .. ( وده فيه توصيات هامة جداً) ..
** مع توقع بعض الامطار على مناطق الساحل الشمالي وشمال الدلتا وشمال سيناء ( خلال الاسبوع ) ما بين خفيفة إلى متوسطة ..
#طيب الجو ده تأثيره ايه على الزرع:
الفراولة في معظم المناطق دلوقتي بدأت تقسم جهدها للنمو الخضري والتزهير والعقد والتحجيم والتلوين .. ودي فترة معقدة وحرجة جدا.. وبسبب اللخبطة دي هيبدأ يحصل مشاكل في امتصاص العناصر الأساسية زي الفسفور والكالسيوم .. كمان الأجواء مناسبة لبعض المشاكل المرضية ..
عموماً خلينا نركز مع بعض قدر الإمكان في اللى هقوله ده:
#باختصار_شديد...
@@ الزرع اللى متأخر شوية لازم الرش على الأقل مرة في الأسبوع ده بالبوتاسيوم فوسفيت (بمعدل ٤ إلى ٥ سم للتر) مع السلسليك والطحالب..
@ @@ ممنوع الرش بالأحماض الأمينية تماماً .. دي فترة العفن الرمادي وخاصة في الأجواء الباردة وزيادة الندي... رشة وقائية ضد العفن الرمادي لان ده الجو المناسب له تماما ( ازوكسي ستروبين ، دايفنكونازول ، تتراكونازول ..) ودي مواد فعالة فترة الامان (PHI) من ٢ إلى ٤ يوم ..
@@ التسميد بنترات الكالسيوم مع حامض النيتىريك ( ٤ ك من كل منهما ).. هام جداً خاصة صنف السينساشن اللى على وش تبشير ..
@@ دي فرصة كبيرة للتخلص من الاكاروس انتهازاً للبرد وقلة نشاط الاكاروس ( المواد الفعالة هي هيكسي ثيازوكس و فينازاكوين وفينبيروكسيمات ..الخ) ،
@@ حافظ على الزرع بعد الملش ضد اعفان الجذور والعفن الحلقي والمرض الجديد ( لفحة الفومبسيس) على الفريش وكمان تبقع الاوراق العادي ( فطر ميكوسفيريلا ) على الفريجو ... وذلك باستخدام المواد الفعالة جدول اوروبي: (ازوكسي ستروبين ، بوسكاليد ، فلودكسانيل ، فليوبرام ، كابيتان ، بيراكلوستروبين ، دايميثومورف ، فولبيت ...الخ) ... وراعي فترة الامان (PHI) ......
#المختصر:
** قيراط فروالة تركيز خير من فدان رحرحة ...
** معندناش شغلانة الا الزراعة ...
** خد بالاسباب كلها والنتائج على الله ..
اعمل مشاركة ولا تكتفي باجترار الكلام لنفسك ... المنشور على الصفحة حق لكل الناس فشارك في توصيل الحق لأهله
..
دمتم طيبين وموسم خير وبركة عليكم جميعاً ...
دكتور محمد علي فهيم
25 نوفمبر 2024
16 هاتور 1741
25
