بشاير - محصول القمح غلة العباد ومؤونة الأيام

محصول القمح غلة العباد ومؤونة الأيام

السلام عليكم جميعاً ..

اتكلمنا كتير ان الموسم ده غير اى موسم والجو غير اى جو ...وطبعاً المفروض ان المعاملات والإجراءات تكون مختلفة ومتوافقة مع التغيرات دي ..

ان شاء الله هنكون مع بعض ...

محصول

أول بأول ...

نبدأ بمحصول #القمح ... غلة العباد ومؤونة الأيام ...

#نركز_بقة:

وعشان الغلة حالياً اما انزرعت او بتتزرع أو هتتزرع ...

** ⬇️ #أولاً .. الغلة المنزرعة من أول هاتور (اللى عدى على عمرها شهر تقريباً):

1*** ينصح عدم تأخير رية المحاياة / التشتية عن 25 – 30 يوم عدا لو نزل مطر أو للأرض اللى بتمسك الميه ... الخ ...

2*** مكافحة الحشائش العريضة قبل الري بيوم ، ورش الحشائش الرفيعة يكون الرش بعد الري والمبيدات المشتركة يكون بعد الري برده (الكلام واضح وسهل اهو – ملهوش لازمة الغلط) ....

3*** ضرورة إضافة من 10- 12 لتر حامض فسفوريك أو منقوع السوبر فوسفات مع رية المحاياة ( التشتية ) لزيادة تنشيط الجذور في ظروف نقص التهوية بسبب تشبع الارض بالرطوبة أو بسبب انخفاض الجو ليلاً ..

4*** بعد كده يجب عدم تعطيش النباتات خاصة أثناء فترات التفريع وطرد السنابل، وفي كل الأحوال يجب عدم الإسراف في مياه الري...

** ⬇️ #ثانياً .. الغلة المنزرعة الأيام اللى فاتت (واللى النمو بتاعها ضعيف شوية بسبب البرد بتاع بالليل والشبورة):

1*** اجراء الرش للزراعات دي بعالى الفسفور ( > 40%) مع سيتوكينين 4% او الاحماض الامينية للمساعدة في دعم النمو بسبب الأجواء الباردة وزيادة فرق حرارة الليل والنهار ..

2*** اهم حاجة لو نزل مطر لازم تصفي الأرض من الميه بسرعة لان الميه هتبرد الأرض وهتضعف النمو اكتر ( للزراعات اللى مزروعة من 15 يوم فأقل ( الكلام سهل اهو) ...

3*** ميعاد مبيدات الحشائش زي ما قلنا فوق ( بلاش تجويد ) ...

** ⬇️ #ثالثاً .. الغلة المتأخرة اللى لسه هتتزرع الأيام دي ( ركز عشان خاطر ربنا ):

1*** للزراعة المتأخرة .. يفضل تكون الأصناف اللى هتتزرع هي أصناف مصر 4 – سخا 95 - سدس 14 – سدس 15 لأنهم مبكرين شوية ..

2*** ضرورة نقع التقاوي فى محلول مخفف من نترات البوتاسيوم لمدة ساعة قبل الزراعة بيوم ولو الأرض فيها نسبة ملوحة يتم النقع في محلول ملحي ( مياه صرف زراعي) .

3*** يفضل إضافة شيكارة يوريا مع الزراعة ( كجرعة تنشيطية ) لتسريع ظهور القمح في سطح الأرض وزيادة نمو البادرات ..

4*** للزراعة المتأخرة ( بحري) بعد ذرة أو فاصوليا او كرنب وغيره ، يتم علي نفس الخطوط حتي لا يتأخر في الزراعة ، مع ضرورة نثر سوبر فوسفات ( 200 ك) و 50 ك كبريت زراعي ( لو قدرت) على وش الخطوط قبل الزراعة للتدفئة وتسريع الانبات ... ولو بعد بطاطس شتوي ( نحرث ونحط السوبر والكبريت وشيكارة يوريا مع الزراعة ) ...

مش طالب منكم غير حاجة واحدة – وصلوا الكلام ده لكل مزارعين الغلة الغاليين على قلوبنا جميعاً ... بعد اذنكم

دمتم طيبين وموسم خير وبركة عليكم جميعا ...

دكتور محمد علي فهيم

16 ديسمبر ٢٠٢٤

8 كيهك ١٧٤١

١٥ جمادى الآخرة ١٤٤٦ هـ

محصول القمح غلة العباد ومؤونة الأيام

الملخص المفيد

محصول القمح غلة العباد ومؤونة الأيام

المشاركه علي منصات التواصل الأجتماعي

عدد المشاهدات