شهدت بعض الطرق السريعة بمحافظات الدلتا عرض البصل فى «شكائر صغيرة» بأوزان 5 و7 و10 كيلوجرامات، لبيعها للمواطنين مباشرة بعيدًا عن الأسواق وبأسعار أقل.
وتراصت أعداد كبيرة من شكائر البصل متعددة الأحجام والأنواع على جانبى طريق «المنصورة- أجا»، وحرص عدد كبير من الفلاحين على البيع المباشر للأهالى، بعيدًا عن تجار الجملة والتجزئة.
وخلال الفترة الأخيرة، شهد سعر البصل ارتفاعًا كبيرًا حتى بلغ 60 جنيهًا ببعض المناطق، فيما اختلفت أسعاره ما بين الأسواق فى المحافظات، بينما تراوح سعره على الطرق ما بين 25 و30 جنيهًا فقط.
وقال أحمد عبدالواحد سند، «فلاح»: «التاجر بيستلم مننا البصل بسعر منخفض ما بين 17 إلى 22 جنيه، بينما يصل للمواطنين بسعر 50 و60 جنيه بسبب النقل والبيع من تاجر لتاجر».
وأضاف: «إحنا السنة اللى فاتت خسرنا أموال كتير فى البصل، وهذا العام قللنا المساحة المزروعة منه، وأنتجنا كميات أقل، والتاجر بيستلم بسعر بين 17 و22 جنيه حسب نوع البصل وأنا بأبيع للجمهور بسعر بين 25 و27 جنيه أقل من سعر السوق بأكتر من 20 جنيه».
وقال رجب فيروز، تاجر بصل يبيع على طريق «المنصورة- أجا»: «أنا ببيع على الطريق لأن له زبون بيشترى كميات وهو ماشى، خاصة إن السعر هنا أقل من السوق بكتير».
وأضاف: «أنا بشترى الكيلو من الفلاح بـ27 جنيه وبأبيع بـ30 جنيه علشان حق المشال والعمالة والمواصلات، وتاجر الجملة بيشترى منى بنفس السعر لكنه بيبيع لتاجر القطاعى وبعدها للمستهلك، فلازم كل واحد يكسب، وده سبب فرق السعر من الفلاح أو على الطريق وبين الأسواق».
وأشار إلى أنه «يوجد 4 أنواع للبصل، أفضلها الأحمر الطنطاوى والإيطالى بسعر 28 جنيهًا للكيلو، ودول الأكثر استخدامًا، يليهما الجيزة وسعره 20 و22 جنيهًا، والبصل الذهبى من الشرقية وسعره 20 جنيهًا، بينما أقلها البصل الأبيض ويسمى (الفتيل) وسعره من 13 إلى 15 جنيهًا، وهو من الصعيد ويعد الأرخص سعرًا».
من جانبه، أكد عبده العجمى، تاجر جملة، وعضو الغرفة التجارية بالدقهلية: «البصل اللى بيتباع على الطرق بيكون وزنه أقل من الحقيقى، وبعض التجار بتبيع الشكارة ويقولك 10 كيلو ولو وزنتها مش هتزيد على 7 كيلو، وعلشان كده مفيش موازين مع البياعين».
وأضاف: «البصل فى سوق الجملة بيتباع بسعر 28 إلى 35 جنيه فقط، لكن الأسعار فى الأسواق بتزيد وتختلف حسب المنطقة، يعنى أسواق المناطق الشعبية الأسعار فيها أقل من الأسعار فى الأسواق الموجودة فى المناطق الغنية والراقية».
145
