- معظم زراعات البطاطس للعروة النيلية او الشتوية المبكرة (فى المنيا) تعدت عمر 55- 65 يوم فى مناطق البرجاية وصفط اللبن وزهرة والعمودين وطحا وتلة وبهدال وبني غني وابيوها ... وابو جيرج وان كانت بعض الزراعات المتأخرة والتي تعدى عمرها من 40-45 يوم فى باقي المناطق مثل مينبال وبعض قرى مطاي وبني مزار ...
- معظم الاصناف المنزرعة فى المنيا هي بيرن - ميترو - ليدي بالفور ... وباقي الاصناف هي كارا وبلليني وليدي روزيتا وبنوميره واريزونا
- لا تعانى زراعات البطاطس من اي اصابات حشرية او مرضية (الا بعض الحقول القليلة والمتناثرة بها بعض الاصابات بدودة ورق القطن وتم مكافحتها)
هااااام ... نظراً للاجواء الحارة وشديدة الحرارة التى سادت اثناء موسم النمو للبطاطس ... فحدث استنزاف وضغط كبير على النمو وتأثر وتراجع كتير ... وبعد انكسار الحرارة وسيادة جو معتدل (ليلاً) بدأ الزرع فى اعطاء نمو خضري غزير (جداً) لدرجة ان النمو اللى حصل فى الاسبوعين اللى فاتو بس بكل النمو خلال الموسم كله ....
وده معناه ايه؟؟
ان العمر الحقيقي للزرع ناقص من 20 -25 يوم ولا يحسب من الزراعة .. والنقطة دي مهمة جداً جداً جداً .. لان البطاطس الان تعطي جهد غير طبيعي للنمو الخضري رغم ان العمر ده بتاع الصب والتحجيم ... وعشان البطاطس تعطي محصول (ذو شأن ) لازم نصبر عليها الموسم ده وبلاش استعجال التقليع ... بلاش استعجال التقليع ..
عشان كمان البطاطس لا تعطي كامل محصولها الا فى الشهر الاخير من عمرها (الحقيقي) .... وفى ظل ان السوق هيكون ماسك نفسه وحتى نص ديسمبر التاني .. فبكررر تاني ... بلاش الاستعجال فى التقليع
وهنا فيه شوية توصيات هامة خاصة بادارة ما تبقي من موسم الانتاج (للعروة النيلية) سواء فى المنيا او الطويلة وبلقاس وطلخا او منوف او كفر الدوار... وغيرها :
- اضافة من 10 -12 كيلو بوتاسيوم (0 . 0 . 50) حقناً مع مياه الري وخلال الريات المتبقية من الموسم...
- اضافة من 3- 4 لتر حامض فسفوريك (80-85%) حقناً مع مياه الري مع عدم خلطه مع البونتاسيوم ويكرر لمدة ريتين متتاليتين ويساعد جداً فى دعم الدرنات فى عمليات التحجيم.
- الابتعاد عن اضافة اى مصدر للازوت فى كل المركبات اللى هنضيفها خلال هذه الفترة .. لان معظم الزراعات المبكرة فى مرحلة "هياج" للعرش واحنا عاوزين الزرع يتجه "بقوه" ناحية الصب والتحجيم والترصين ...
وللزراعات المتأخرة واللى بتعانى من نمو مش قوى يتم اجراء التالي:
حقن:
1.5 لتر حامض فوسفوريك + 1 كيلو جرام سولو كروس + 3 ك نترات نشادر محبب
وبعدها يتم رش ورقي :
يتم رش مركب هيومك سائل بمعدل لتر / فدان + مركب أتوجان بمعدل 600 / فدان .
ثم يتم تكرار مع الرش بمركب فوسكيم بمعدل بمعدل 450 سم / فدان .
اما الري ... فلو سمحتم ... لو سمحتم بلاش 50 فتحة مرة واحدة دي .. ارجوكم الحذر من زيادة مياه الري خلال هذه الفترة (كمان ان العرش مالى بطاني الخطوط وبيعيق المياه فبتكتر حول النباتات) ... الحل ان يكون الري على الحامي وب 2 او 3 فتحات (حواويل) بالكتير ...
ان شاء الله سيكون موسم زراعي مجزي لكل احبتي واخوتي مزارعي البطاطس
دكتور محمد على فهيم
29 اكتوبر 2018
107
