هام جداً للسادة المزراعين لنبات اقوى 💪 - ومبيدات اقل 👎 💥 اهتم انك تزود المقاومة الطبيعيه للنبات عن طريق رفع قدرة الجهاز المناعي للنبات علي مقاومة الامراض الفطريه و تحسين الصحه العامه للنبات وده يساعدك فيه استخدامك لمركبات زي ( البوتاسيوم فوسفايت ؛ فوستيل المنيوم ؛ سلسليك اسيد ؛ فيتامين c ؛ فيتامين B ) المركبات ده هتساعدك انك تقلل استخدامك للمبيدات وتقلل من التكاليف . استخدامك للفيتامينات مهم جدا لانها بتقوم بدور مانع الاكسده و منع تكون المواد الناتجه عن احساس النبات بالاجهاد وبالتالي تساعد النبات علي تحمل ظروف الاجهاد بالاضافه لدورها في تنشيط عمل الانزيمات داخل النبات . 💥 ياريت تستخدم العناصر الصغرى في النص الاول من عمر النبات لان رش العناصر الصغرى عامل زي الطالب اللي بيذاكر اول بأول أكيد بيكون أشطر🤓 كتير من اللي بيذاكر بعد نص الترم وطبعا اللي ذاكر ذاكر 😉 . 💥حاول تستفاد باقصى قدر ممكن من العناصر المدمصه علي حبيبات التربه والمخزنه من فتره او اللي التربه غنيه بيها بالفعل عن طريق استخدامك لمركبات الهيومك والفولفيك و الكبريت الزراعي والجبس الزراعي اثناء الخدمه و استخدامك للاحماض قدر المستطاع . 💥 الكالسيوم بطئ الحركه من العناصر المهمه جدا واللي بتزود صلابة جدر الخلايا وبالتالي مينفعش ترشة في التلت الاخير من عمر النبات لاول مره فى الموسم وتنتظر منه النتيجه المرضيه ! لأن برضه اللي ذاكر ذاكر 😉 استخدمه في التلت الاول من عمر النبات وكرر الرشه مرتين كمان ع الاقل او حسب الاحتياج . 💥 في المحاصيل المزهره اهتم جدا برش المولبدنيوم و البورون والزنك والمنجنيز عشان تحصل علي حبوب لقاح افضل و متوك افضل و اخصاب افضل وبالتالي عقد افضل وافضل 👌 💥 وانت بترش المبيد الحشري خصيصا والمبيدات بشكل عام التزم بالمعدلات المكتوبه علي العبوة لان الشركه المنتجه توصلت للمعدلات ده عشان تحقق المعادله الاهم وهي افضل نتيجه للقضاء علي الافه مع اقل تكلفه مع اقل ضرر اجهاد واقع علي النبات نتيجه الرش بالمبيد واي زيادة منك في المعدلات المذكورة مش هيفيدك في قتل الافه لا ... ده هيخلي الافه اشرس فيما بعد علي المدى البعيد وده اللي بيخليك تيجي تقول المبيد الفلاني مبآش يجيب نتيجه زي زمان وقتها متلومش الا نفسك عليك جزء كبير من الغلط استخدامك لمعدل اعلى من الموصى بيه = استخدامك لمعدل اقل من الموضى بيه 💥 مش معني انك بترش كل يوم يبقى ده افضل طريقه لانك تقضي علي الافه بالعكس انت بتجهد النبات و بتهدر فلوسك علي الارض وبتزود تكاليفك جدا بدون مردود . 💥علي اد ما تقدر بلاش الخلط في الرش عشان توصل لافضل نتايج ممكنه . 💥 مش معني ان المبيد الفلاني تركيز مادته الفعاله اعلي من ٥٠ ٪ انه هيكون نتيجته افضل من المبيد اللي يحمل مادة فعاله اخرى وتركيزها اقل من ٥٠٪ . يعني مش بالارقام 😉 💥اساس النبات وقوته في جدرة .. فلازم تهتم جدا بالصرف الجيد و الحرث الجيد والخدمة الجيدة والرى المنتظم . 💥 اوعى تستخدم سماد بلدي غير متحلل بحجة انك معندكش مكان تكمر فيه نواتج المواشي فبتستخدمها اول باول بدون تحلل ... ده هيجيبلك افات كتيرة سواء حشريه او فطريه او بذور حشايش احنا مش ادها 😥 💥 ياريت ندخل ثقافة استخدامنا للمركبات الخاصه بضبط ph محلول الرش قبل اضافة مخلوط الرش او المبيد او المغذى المستخدم - ده هيوفر علينا كتير جدا وهيعظم جدا جدا جدا من قوة المركب المستخدم في الرش ؛ ياريت نهتم بيها نفس اهتمامنا باختيار نوع المبيد اللي هنرشه . 💥 توقيت الرش ودرجة حرارة الجو في اليوم من اهم العوامل اللي هتنجح عملية الرش و هتديلك افضل النتايج المرضيه . 💥 للاسف معندناش مركب حيوي مصري قوي لان معندناش التقنيات اللي تخلينا ننتج مركب حيوي قوي يكافئ المبيدات الكيماويه .. عشان كده بلاش تجازف وترش مركب حيوي عشان تكافح افه موجوده بالفعل عندك . 💥 الاحماض الامينيه بتبدأ تتكسر عن ph4 فلو عاوز تاخد افضل النتايح منها استخدمها رش فقط مع الاهتمام بالنقطه اللى قبل قبل ده👆 💥 بلاش رش احماض امينيه ولا تسميد او رش ازوت وقت الشك في احتمالية وجود اصابه بالامراض . 💥 العطش وعدم انتظام الري من اهم العوامل اللي كفيله بتدهور حالة النبات وهزيانه اهتم بضبط الري اقصى اهتمام واديله أولويه .
149
