طقس شتوي مذبذب وارتفاع قياسي في درجات حرارة النهار بقيم كبيرة وحتى نهاية الأسبوع ان شاء الله ...
متوقع ان تصل الحرارة إلى قيم صيفية صريحة ( 31 -33 °م ) في معظم الانحاء مع استمرار الحرارة ليلاً حوال الـ 10° م
واهم المظاهر المتوقعة خلال الموجة دي هي:
⬅ أولاً: ** فرق حرارة كبيرة بين الليل والنهار...
وده بيكون ظروف مناسبة للآفات الحشرية اللى كانت في بيات شتوية ( ديدان الأوراق والثمار) او الآفات الموسمية زي المن على البطاطس والقمح والفول والتربس على الازهار للمانجو والكمون وغيرها ...
⬅ ثانياً ** تغير اتجاه الرياح لتكون جنوبية غربية "دافئة جداً" ...
وده ممكن يسبب مشكلة للفاكهة اللى زهرت مبكر وداخلة في مرحلة العقد ( زي المانجو اللى ما قصفش التزهير المبكر ) وبعض المتساقطات وأيضا محاصيل الفول البلدي والقمح والكمون واليانسون والخضر المزهرة تحت الانفاق ...
⬅ ثالثاً ** زيادة في نشاط الرياح على اخر الأسبوع ..
اهم مكلة وهي ممكن يسبب رقاد القمح لو المزارع روى في الفترة دي ...
⬅ رابعاً: ** زيادة كبيرة في الرطوبة النسبية ..
طبعاً هتعمل مشكلة كبيرة في تجديد الإصابة ببعض الامراض الهامة زي اللفحة المتأخرة على البطاطس والبياض الدقيقي على المانجو والفلفل والباذنجان وغيرها ... ده غير التأثير على نقص او تذبذب معدلات الامتصاص وممكن ينتج عنها نقص بعض العناصر الهماة خلال هذه الفترات ( الكالسيوم – الماغنسيوم – البورون .... الخ) ..
والظروف دي جاية في مرحلة مهمة من كل المحاصيل :
** غلة بتملى السنابل،
** وفول بيكمل تزهير ويملى القرون ،
** وبطاطس صيفي بدأت في التبويض أو التحجيم،
** خضر الانفاق وبصل بحري هيزيد جراحهم من الصدمة الحرارية وشوية الأمراض ،
** بنجر وبصل وثوم وبطاطس شتوي في نهاية الموسم يناسبها الجو ده قوي،
** فاكهة في أول محطة لسريان العصارة _( مانجو - زيتون - متساقطات - برتقال ...) ..
** الأرض بتجهز لزراعة العروة الصيفية "المبكرة" سواء محاصيل ذرة مبكرة او خضر العروة المكشوفة طماطم وفلفل وباذنجان وخيار وخلافه ...
زحمة زحمة ....
نركز بقه مع بعض شوية ...في المنشور القادم نشوف هنعمل ايه
دكتور / محمد علي فهيم
26 فبراير 2024
18 أمشير 1740
145
